Tuma min na an ye ɛntɛrinɛti kalan in daminɛ Gara la, an y'a ɲɛfɔ kalandenw ye u bɛ se ka kunnafoni ɲini gugolu (google) kan cogo min na. O kɔ fɛ an ye bɛɛ bila i ka i sagola ɲinini kɛ gugolu kan. Bɛɛ y'i ta ɲini wa bɛɛ y'i ka jaabi sɔrɔ. O de kɛra kabako fɛn ye an ka ni togodala ɛntɛrinɛti kalanden ninnu bolo bawo, u ye u to u sigiyɔrɔ la ka kunnafoni sɔrɔ fɛnw kan, fɛn minnu kunba tun bɛ u la, ni u tun t'a dɔn u b'a kunnafoni sɔrɔ cogo min na. U ye fɛn caman ɲini. O de sen fɛ, cɛkɔrɔba dɔ, n'o ye donso ye, o y'a ɲini ka kunnafoni sɔrɔ Ameriki donsow kan. O jaabi sɔrɔlen a fɛ ɛntɛrinɛti kan, a kabakoyara kosɛbɛ, wa a nisɔndiyara kosɛbɛ. A ye tile bɛɛ k'a bora la k'a ɲɛfɔ mɔgɔw ye. O de sen fɛ, a y'a jira ko ɛntɛrinɛti kan, mɔgɔ bɛ taama ka taa jɛn fan bɛɛ k'i to i sigida la. A y'a jira ko ɛntɛrinɛti bɛ se ka kɛ sababu ye, u ka faamuyali sɔrɔ fɛn caman kan walasa ka fura sɔrɔ u ka gɛlɛya dɔw la togoda la. Kabini o kɛra, cɛkɔrɔba ma tumasi bila bilen n'a ma taa ɛntɛrinɛti kalanyɔrɔ in na. O de y'a to bi, a bɛ se ka ɲinini kɛ a yɛrɛ ye ɛntɛrinɛti kan wa a bɛ se ka cikan ci mɔgɔw ma ka mɔgɔw ka cikan kalan fana i n'a fɔ kalanden tɔw.